leaderboard
DIKLIK.CO - Pemilihan Ketua RT di Kampung Parit Aman tahun ini berlangsung aman, tertib, dan penuh harapan… walaupun harapan itu kebanyakannya datang dari mulut Wak Labu sorang.
Sejak awal pencalonan, Wak Labu memang terkenal pandai berjanji.
“Kalau sayo jadi Ketua RT, jalan kite mulus macam pipi pengantin. Lampu jalan hidup semalam suntuk. Kampung kite maju!” kato Wak Labu di Kedai Kopi Bahagia sambil ngaduk kopi pinjam sendok orang.
Warga pun tepuk tangan.
Entah kagum, entah terpengaruh suasana kopi panas pagi itu.
Akhirnyo, Wak Labu menang telak.
Sejak dilantik, keberadaan Wak Labu paling mudah dijumpai di kedai kopi. Kantor RT Pindah ke Kedai Kopi
Pagi ado.
Siang ado.
Petang pun ado.
Kalau ditanyo kenapo selalu di situ, Wak Labu dengan yakin menjawab,
“Sayo ni tengah turun lapangan. Menyerap aspirasi masyarakat.”
Padahal yang diserap Cuma pisang goreng Pak Mail punyo.
Masuk bulan kedua, warga mulai bertanyo.
Pos ronda yang dijanjikan tak kunjung berdiri.
Parit masih mampet.
Lampu jalan tetap gelap gulito.
Bila ditegur, Wak Labu santai menjawab,
“Sabar lah… pembangunan ni bertahap.”
Tahap pertamo: janji.
Tahap keduo: cerito lagi.
Tahap ketigo: lupo.
Masalah Wak Labu bukan setakat ingkar janji. Kalau orang bercerito, dio mesti menang sorang.
Pak Ujang pernah bilang dapat ikan 4 kilo.
Wak Labu cepat menyampuk,
“Ah… dulu sayo dapat ikan 10 kilo. Ikan tu takut samo sayo.”
Besoknyo lagi, ado warga cerito anaknyo juaro kelas.
Wak Labu tak mau kalah.
“Anak sayo dulu hampir juaro provinsi… Cuma dio malas belajar.”
Anaknyo yang duduk di belakang Cuma tunduk malu sambil bisik,
“Ayah… sayo dulu ranking belasan…”
Suatu malam listrik kampung padam total. Warga panik cari Ketua RT.
Ruponyo Wak Labu duduk rileks di kedai kopi, pasang lilin depan cangkir.
“Pak RT, listrik mati ni!” kata warga.
Wak Labu hirup kopi pelan-pelan lalu jawab,
“Bagus lah… ini program hemat energi.”
Sejak malam itu, warga sepakat satu keputusan tak resmi:
Kalau ado orang banyak janji tapi kerjo tak nampak,
Cukup bilang… “jangan-jangan dio belajar kepemimpinan samo Wak Labu.”
Dan sampai hari ini, Wak Labu masih jadi Ketua RT —
Sebab setiap rencana pemilihan ulang selalu batal…
…karena rapatnyo berubah jadi sembang kedai kopi. ☕😄
_By Bang KR
(cerita ini hanya bersifat hiburan semata_ )
